ABNKKBSNPLAko?!: Suring Basa

I. Pagkilala sa May-akda

Si Roberto Ong o mas kilala sa tawag na Bob Ong ay isang tanyag at mahusay na manunulat hanggang sa kasalukuyang panahon. Siya ay naging isang guro, manunulat, web developer, at naging webmaster ayon sa paglalarawan niya sa kanyang librong ABNKKBSNPLAko. Ang kanyang pook sapot na Bobong Pinoy ay nanalo sa People’s Choice Philippine Award for Weird or Humor noong 1998. Nakapaglathala na siya ng sampung libro na kasalukuyang binabasa at tinatangkilik ng mga Pilipino dahil sa lawak ng kanyang imahinasyon sa pagsusulat ng mga nakakatawa ngunit makabuluhang mga libro na sumasalamin sa kultura at gawi ng mga Pilipino. Hindi pa rin batid ang tunay na katauhan ni Bob Ong ngunit hindi ito naging hadlang sa pagtangkilik at pagsuporta sa kanyang mga libro.

 

II. Layunin ng May Akda

            Layunin ng akdang ABNKKBSNPLAko na ilahad ang mga karanasan ng may akda noong ito ay nasa kapanahunan ng pag-aaral. Nais nito na hikayatin ang mga mambabasa sa paraang pagsasalaysay ng mga karanasan upang makuha ang atensiyon at loob upang mawili ang mga ito. Ipinapakita sa akda ang kahalagahan ng pag-aaral sa pagiging daan ng tagumpay sa buhay at imulat ang kaisipan ng mga mambabasa sa kasalukuyang kalagayan ng ating lipunan at nais ding ipabatid na hindi madali ang pagiging guro. At huli, nais nitong mag iwan ng aral tungkol sa mga pagsubok sa buhay na kahit may mga panahong nadadapa ay nararapat pa ring bumangon at ipagpatuloy ang buhay.

 

III.  Kaisipang Taglay ng May Akda

            Ang kaisipang taglay na nakapaloob sa akda ay tungkol sa buhay na kinaharap ng may akdang si Bob Ong noong siya ay nag-aaral kaya’t hindi maiiwasang balikan ng mga mambabasa ang kanilang mga karanasan noon sa paaralan dahil sa pagbabasa ng akdang ito na sadyang nakakaaliw. Ito ay kapupulutan ng aral kung saan ipinahayag ang kahalagahan ng edukasyon sa ating buhay at masasalamin din dito ang pagiging matatag ng isang guro, isang mag-aaral o kahit ng isang tao na ipinagpapatuloy pa rin ang takbo ng buhay kahit na minsan ay nadadapa sa mga problema. Masasabing makatotohanan dahil ito ay nagaganap pa rin sa kasalukuyang panahon.

 

IV. Kaugnayan ng Akda

A. Sa aking Sarili

            Ang akda ay naglalahad sa mga karanasan ng pagiging isang mag-aaral at bilang isang mag-aaral sa kasalukuyang panahon ay maiuugnay ko ang akdang ito sa aking sarili sapagkat ang mga nakapaloob dito ay akin ding nararanasan na sadyang nakapagbalik ng aking mga alaala noong ako ay nag-aaral hanggang ngayon. Sa aking pagbabasa nito ay napagtanto ko ang tunay na kahalagahan ng pag-aaral dahil dito nakasalalay ang aking magiging kinabukasan.  Ang akdang ito ay lalong nagbigay sa akin ng inspirasyon sa aking pag aaral dahil ipinahayag nito ang mga problemang kinaharap ng may akda ngunit sa kabila ng kanyang pagkakadapa ng maraming beses ay hindi pa rin siya sumuko at ipinagpatuloy niya ang kanyang buhay. Dahil dito, lalo kong pagbubutihin ang aking pag-aaral at isasabuhay ko ang aral na aking napulot sa akdang ito.

 

B. Sa aking Pamilya

            Ang mga magulang ay nagpupursigi na ibigay ang lahat ng makakaya para sa kapakanan ng kanyang anak at isa na rito ang pagbibigay ng edukasyon. Maiuugnay ko ang akdang ito sa aking pamilya sa paraang pagsasakripisyo nila ng kanilang oras at lakas sa akin upang ako ay makapagtapos ng pag-aaral. Katulad sa akda ay sinuportahan ng pamilya si Bob Ong sa pag-aaral kahit na minsan ay nalulugmok ito sa mga problema. Kahit na ganoon ang kaniyang kalagayan ay naroon pa rin ang kaniyang pamilya upang siya’y tulungan sa pagkakadapa sa problema. Dahil rin sa akdang ito ay mas lalo kong pinahalagahan ang aking pag-aaral para sa aking pamilya bilang sukli sa kanilang pagsuporta sa akin.

 

C. Sa aking Komunidad

            Ang akdang ito ay masasabi kong nangyayari rin sa aking komunidad sapagkat sa komunidad makikita ang mga taong patuloy na nag-aaral at mga taong nariyan upang tumulong na ika’y iangat sa buhay. Maiuugnay ko ang akdang ito sa aking komunidad sa paraang ang komunidad ay may malaking impluwenisya sa buhay ng tao kagaya na lamang sa akda na mayroong mga taong nakapaligid na huhusga sa kung ano ang katayuan mo sa buhay. Ngunit kahit ganito ang nangyayari sa aking komunidad ay nagbibigay daan pa rin ito upang magtagumpay sa buhay dahil ito ay nagsisilbing pagsubok na kailangang lagpasan.

 

 

D. Sa aking Mundo

            Ang akdang ito ay makapagbibigay ng aliw sa mambabasa pati na rin ng kaalaman at inspirasyon sa buong mundo. Makatutulong ang akdang ito upang baguhin ang kasalukuyang kalagayan ng ating mundo sa paraang pagbibigay nito ng aral sa bawat isa tungkol sa kahalagahan ng edukasyon. Hindi lamang sa kapwa Pilipino makakapagbigay ng aral ngunit pati na rin sa mga taong nasa iba’t ibang bansa na nalulugmok sa problema. Isa itong paraan upang ibangon ang bawat isa sa pagkakadapa at muling ipagpapatuloy ang nasimulan. Malalaman din ng mga tao sa ating mundo ang hirap ng pagiging isang guro at ang akdang ito ang magpapamulat sa lahat na pahalagahan ang pag-aaral at sakripisyo ng isang guro dahil sila ang tumutulong upang tayo’y maging matagumpay sa buhay. Ang akdang ito ay magdudulot ito ng kaalaman tungkol sa kahalagahan ng edukasyon na magiging daan ng kaunlaran ng ating mundo.

 

V. Pangkalahatang Impresyon sa Akda

            Sa mga oras na aking inilaan sa pagbabasa ng akdang ito ay masasabi kong naging sulit at makabuluhan ang aking pagbabasa. Nakakaaliw ang pagbabasa nito dahil sa mga nakakatawang nakapaloob ngunit sa kabila ng nakakatawang pangyayari dito ay may malalim na pakahulugan ang may-akda. Ito ay nakapagbigay ng aral sa akin maging sa ibang mambabasa nito tungkol sa kahalagahan ng pag-aaral. Sa mga nabasa kong akda ay isa ito sa tumatak sa akin ng labis dahil sa pagbabasa ko nito ay nagbabalik sa akin ang mga karanasan ko sa aking paaralan magpahanggang ngayon na nakapagpaalala sa akin ng mga nagawa ko noon upang malagpasan ko ang aking problema sa paaralan. Humahanga rin ako kay Bob Ong dahil isa ang kanyang akda sa nagbigay sakin ng inspirasyon sa pag-aaral sa pamamagitan ng paglalahad niya ng kanyang karanasan sa paaralan. Dahil sa librong ito ay lalo kong pagbubutihin ang aking pag-aaral at itatak sa aking puso’t isipan ang iniwan nitong aral na magiging daan sa aking magandang kinabukasan.